衫褲甩色大救法

件衫未著第一次洗之前，可以用以下方法︰
將粗鹽及白醋加入一盆清水裡面，份量大約係一件衫加1-2中式湯匙鹽及2-3中式湯匙白醋(份量唔需要太準確，但要聞到有醋味)，攪勻之後放件衫(乾既)入去浸15-30分鐘，然後過清水，千萬唔好用洗衣粉/皂。用清水過左d甩左出黎既顏色同埋聞落去冇醋味，咁就得。如果甩得太厲害的話(過好多盆清水都仲好多色甩出黎)，可以再用多d鹽同醋浸耐d。

記得浸完一定要用清水過得好乾淨喎，否則會好易損壞件衫呀。同埋絲質/易爛既衫就最好唔好試。一般棉質衫、牛仔褲、布袋果d就冇問題既。呢個方法係以前做蠟染既時候老師教既，古時d人染完布要定色都係用呢個方法呀！我自己都試過係得既。

不過，如果你件衫已經洗過，呢個方法就未必好有效。但你都可以試下。

其實有顏色 (特別係會甩色)既衫，應該係分開洗架！咁先唔會洗到其他衫都染晒色。