近年，有句口頭禪——贏在起跑綫。意即求學前攬盡優勢，以求快人一步彈出直往終點。
我很喜歡睇賽馬，因當中有無窮哲理及啟示。馬如人，分好多種天分、資質、血統，所以，操人如操馬，不可一本通書睇到老，更不可一套方法就逼所有人、所有馬照操，如此，效果必定不會好。例如不少馬擅跑大長途，其特性為出閘後宜留後跑，隱藏實力，到入直路再拉出大外檔衝刺逢馬過馬。人亦如是，過早大力催逼搏命谷，係，出閘可能彈出，但過早用盡力，將無以為繼。尤其日操夜操，極易令馬匹厭戰。人生是大長途賽事，絕對應該以自然舒服方法競跑，毋須強調贏在起跑綫。
前晚有幸與浸會大學校長錢大康教授共話樽前，哈，原來我倆背景極相似，皆是「輸在起跑綫」的名校學生，佢讀聖保羅男女校，我讀聖若瑟書院，因資質麻麻，一班四十五人，永遠考第三十七，雖不至留班，但次次險過剃頭。如此水準，會考當然「光頭仔」，冇科出色，香港大學、中文大學（上世紀七十年代只得兩所大學）當然唔收，點呢？真巧合，我倆的老爹皆剛有一小筆錢，於是話：「阿仔，嗱，你想出國留學，我只提供一年費用，其他你自己搞掂，諗得掂就去啦！」當然即飛美國，在學術自由風氣之下，我哋兩隻「輸在起跑綫馬」冇咗香港官僚教育制度卡死，立即起飛，由昔日考試成績「滿江紅」，變成科科A！無他，因終可做到——Study what you love & love what you study。錢校長在Computer Science範疇闖出一片天，在名牌大學U of Wisconsin-Madison任教，終被挖角回港，先而科技大學，繼而香港大學，然後出任浸會大學校長。昔日望門興歎的香港所有大學，都以爭取錢大康為目標。這位輸在起跑綫校長的經歷，可會對今天的家長有啟示？
作者: 曾智華
沒有留言:
張貼留言