Byebye你條尾 散水5步曲

辭職，是一門學問。而散水，則是不明文規定到個個打工仔都會Follow，好似唔做唔舒服咁。事實是山水有相逢，禮多人不怪。過咗辭職的心理關口，信又遞埋，而關於散水，你有5件事可以做︰

Step 1︰散水飯

雖然話同枱食飯各自修行，但Last day食餐飯都係為咗做個紀念。就好似畢業前大家突然對碟「頹飯」產生咗感情，辭職後又會唔捨得食開嗰間茶記。至於飯腳人數多寡不是重點，志在畀個機會大家聚一聚啫。

Step 2︰散水Email

臨尾一日，當然唔少得一個Goodbye Email。如果公司人多勢眾，真係多一個唔多，少一個唔少。發散水電郵，目的在於禮貌上通知聲全世界：「我走喇！」，同時間亦作Call人食餅、影相之用。

Step 3︰散水餅

此乃打工仔最關心、最重視的一環。因為派餅一事關乎面子，太「行貨」，會被暗藐，兼且唱你三五七年。究竟派唔派餅？派邊種散水餅？

Step 4︰散水相

不論你推崇「有圖有真相」，還是深信「一張圖勝過千言萬語」，為留個回憶，不少人臨別前總會選擇影幾張，甚至幾廿張散水相。當然，同邊個影、點樣影就you think you lah！

Step5︰散晒所有嘢

做足成日有關散水事宜，有無諗過點樣散盡自己啲嘢？即係清理好自己工作電腦中一些不必要的文件，以及工作枱的一切雜物。一句到尾，職係自己辭，手尾當然要自己執番。